भेट

Diary Excerpt - 4

एक सांगशील
आपले रस्ते अवचित कुठे, कसे जुळले?
आपल्याच नादात चालताना
हे देखणे वळण कसे भेटले?
क्षणाभोवती
ही कसली अनोखी रंगत खुलते आहे
जगणं व्हावं गाणं
अशी स्वरांची संगत जुळते आहे
पण खरं सांगू
या वाटांचं हे असं भेटणं बरं नव्हे
जीवघेणं उत्कट असेल
तरीही ते खरं नव्हे
तुझी दिशा पूर्वीच निश्चित
ती बदलणं उचित नाही
माझ्यापुरतं बोलायचं तर
मला माझी दिशाच नाही
तुझ्या संगतीत
आनंद आहे, आश्वासन आहे, दिलासा आहे
माझा मात्र स्वप्नांच्या हातात
फक्त भंगण्याचाच वसा आहे
म्हणून म्हणतो
अशा वाटांनी मुळात एकत्रच येऊ नये
जीव जडवून चटका लावून
निदान दूर होणं तरी असू नये
पण अशाच वेळी कळून येतं
आपण आपले मालक नसतो
रस्ते आपली दिशा आखतात
आपण फक्त चालत असतो